БҰҰ ЭСКАТО деректері бойынша, республика аймақтың жетекші инвестициялық бағыты мәртебесін сақтап отыр. Тікелей шетелдік инвестициялардың жалпы ағыны 14,4%-ға өсіп, 20,5 млрд долларға жетті.
Инвестициялар құрылымында сауда 4,8 млрд доллармен, өңдеуші өнеркәсіп 4,4 млрд доллармен және тау-кен өндіру секторы 3,4 млрд доллармен көш бастап тұр.
Ірі инвесторлардың бестігіне Нидерланды (4,6 млрд доллар), Ресей (2,9 млрд доллар), Қытай (2,8 млрд доллар), БАӘ (1,6 млрд доллар) және Сингапур (1,4 млрд доллар) кірді. Қаражат технологиялық тұрғыдан күрделі индустриялық және инфрақұрылымдық жобаларға бағытталды.
Инвесторларды қолдау шаралары
Үкімет инвесторлардың мәселелерін нақты уақыт режимінде шешетін Инвестициялық штабты іске қосты. Құны 60 млн доллардан асатын жобалар үшін заңнаманың тұрақтылығын 25 жылға кепілдік беретін Инвестициялар туралы келісім құралы қолданылады. Қазірдің өзінде 62 осындай келісім жасалды.
Реформалар 2029 жылға қарай ЖІӨ-ні 450 млрд долларға дейін екі есе арттыруға және кемінде 150 млрд доллар шетелдік капиталды тартуға бағытталған. Президент Қасым-Жомарт Тоқаев Шетелдік инвесторлар кеңесінің 38-ші пленарлық отырысында Қазақстанның Орталық Азиядағы инвестиция көлемі бойынша көшбасшылығын сақтау ниетін растады.