Әлемдік мұнай бағасы АҚШ пен Иранның бейбіт келісім жасасуға жақындағаны туралы хабарлардан кейін төмендеп жатыр. Эталондық Brent маркасының құны бір баррель үшін шамамен 98 доллар деңгейіне дейін түсті.
Лондон ICE биржасындағы сауда деректері бойынша, Астана уақытымен сағат 08:00-де Brent шілделік фьючерстері 4,87 пайызға арзандап, бір баррель үшін 98,49 долларға дейін төмендеді.
Шілдеде жеткізілетін америкалық WTI мұнайының фьючерстері бір сәтте 5,06 пайызға дейін арзандап, бір баррель үшін 91,71 долларға дейін түсті.
Төмендеуді 23 мамырдағы жаңалықтармен байланыстырады: АҚШ пен Иран бейбіт реттеу аясындағы өзара түсіністік меморандумы жөніндегі келіссөздерді негізінен аяқтады. Уағдаластыққа сәйкес, қақтығысқа дейін әлемдік мұнай мен сұйытылған газ жеткізілімдерінің бестен бірі өтетін Ормуз бұғазы қайта ашылуы тиіс.